Украинанинг Коррупцияга қарши олий суди россиялик олигарх Алишер Усмоновнинг икки миллиард гривнадан ортиқ (48,2 миллион доллар) активларини мусодара қилишга қарор қилди. Бу ҳақда адлия вазири ўринбосари Инна Богатих маълум қилди.
Давлат даромадига қиймати 160 минг тоннадан ортиқ темир рудаси ҳамда "Петер-Сервис Украина" устав капиталининг 100 фоизи ундирилди. Адлия вазирлиги маълумотларига кўра, бу илгари Усмонов назорати остида бўлган ИТ-компаниядир.
2022 йилда Украина Хавфсизлик хизмати Украина денгиз портларидаги бир нечта яширин омборларда сақланаётган ва Усмоновга тегишли бўлган темир рудаси ҳибсга олингани ҳақида хабар берган эди. Маълумотларга кўра, хомашёни кемаларда Россияга олиб ўтиш ва ҳарбий-саноат мажмуаси эҳтиёжлари учун ишлатилиши режалаштирилган бўлган.
Асли ўзбекистонлик Усмонов дунёнинг энг бой одамларидан бири саналади. У ва бир неча яқинлари ЕИ, АҚШ ва бошқа Ғарб давлатлари, шунингдек, Украинанинг санкциялар рўйхатига киритилган. Усмонов бу чекловлар устидан судларга ариза киритган.
Forbes нашри 2022 йилда Усмоновнинг бойлиги 14,4 миллиард доллар эканини ёзган, санкциялардан сўнг унинг бойлиги 11,5 миллиард деб баҳоланган.
Украинада россиялик олигарх Алишер Усмоновнинг 48,2 миллион долларлик активлари мусодара қилинди
Асли ўзбекистонлик Усмонов дунёнинг энг бой одамларидан бири саналади. У ва бир неча яқинлари ЕИ, АҚШ ва бошқа Ғарб давлатлари, шунингдек, Украинанинг санкциялар рўйхатига киритилган. Усмонов бу чекловлар устидан судларга ариза киритган.