Туркия ҳафтумин кишваре шуд, ки ба ҷавобгарӣ кашидани Исроилро дар пасманзари амалиёти низомияш зидди гуруҳи фаластинии "Ҳамос" талаб мекунад. "Ҳамос" дар ИМА ва Иттиҳоди Аврупо созмони террористӣ эълом шудааст.
Президенти Туркия Раҷаб Эрдуғон борҳо ҳодисаҳои Ғаззаро қатли омми фаластиниён номидааст. Исроил ин иддаоро рад мекунад.
Додгоҳи байналмилалии СММ дар Гаага моҳи январи имсол баррасии шикояти Ҷумҳурии Африқои Ҷанубиро алайҳи Исроил бо иттиҳоми қатли омми сокинони Ғазза оғоз кард. Ба ин шикоят Никарагуа, Колумбия, Либия, Мексика, Испания ва Фаластин ҳам ҳамроҳ шуда буданд.
Ҷанг дар навори Ғазза пас аз он оғоз шуд, ки гуруҳи мамнуъ дар Амрико ва кишварҳои аврупоӣ - “Ҳамос” дар як ҳамлаи бесобиқа ба Исроил 7 октябри соли гузашта 240 нафарро гаравгон гирифт. Ҳамчунин гуфта мешавад, ки дар натиҷаи ин ҳамла 1200 нафар кушта шудааст. Қисме аз асирон, асосан занону кӯдакон бо фаластиниҳои боздоштшуда, иваз карда шуданд.