Өзбекстан президентинин күйөө баласы Ташкенттин кымбат районунда миллиондогон долларга сырдуу комплекс куруп жатат. Ал долбоорду ишке ашыруу үчүн 20 чакты турак жай сүрдүрүлдү. Мындай жыйынтыкка “Эркин Европа/Азаттык” радиосунун өзбек редакциясы (“Озодлик”) иликтөө жүргүзгөндөн кийин келди.
Долбоордон кабары бар бир катар булактардын айтымында, кайын атасы, президент Шавкат Мирзиёевдин коопсуздук кызматынын жетекчисинин орун басары Отабек Умаров Ташкенттеги кымбат райондо бир жарым гектар жерди курулуш үчүн бошотуу максатында жергиликтүү тургундарды күчтөп көчүрүүгө кысым көрсөткөн. Ошол үйлөр жана жер тилкеси бардыгы болуп 20 миллион долларга бааланууда.
Долбоор Умаров мамлекеттик кызматкер катары алган расмий маянасынан ашкан байлыкка ээ болгонун дагы бир жолу ачыкка чыгарды.
Ташкенттеги Мирзо Улугбек районунда курулуп жаткан комплекс бери дегенде 20 объектини камтыйт. Анын жанында бир кездери Умаров президенттин кичүү кызы жана балдары менен жашаган үй жайгашкан. Ал Шахноза Мирзиёева менен 2007-жылы баш кошкон.
2018-жылдан тарта айланадагы кеминде 20 кыймылсыз-мүлк түрттүрүлүп, “Озодлик” карап чыккан спутниктен тартылган сүрөттөр көргөзүп тургандай, улам кеңейип бараткан жер аянтында цемент ташыган машинелер, башка курулуш техникасы иштеп жатат.
Шаар жетекчилигиндеги мурдагы аткаминер Умаров айланадагы турак жайларды сатып алуу боюнча өзүнүн “мегапланын” мындан 5 жыл мурун баштаганын айтат. Ал жерлердин тургундары сунушка жок деп айта албаган.
“Ар бири жарым жана жарым миллион доллар турган виллаларды сатып алып, буздуруп салган. Эми өзүнө хансарай куруп жатат”, - деп айтып берди мурдагы аткаминер. Бийликтин куугунтугунан чочулап, ал атын атаган жок.
Жогорудагы мурдагы аткаминердин айткандарын спутниктен тартылган сүрөттөр да тастыктап турат. Убакыт өткөн сайын ал жерде улам бир үйдүн түрттүрүлгөнүн баамдаса болот. Андан тышкары журналисттер курулушка орун бошотуп бериш үчүн көчүп кеткен айрым вилла ээлеринин жакындарын да сөзгө тарткан. “Озодлик” ошол кишилердин аты-жөнүн жана дарегин коопсуздук маселесинен улам ачыкка чыгарбайт.
“Озодлик” Умаровго байланышы бар комплекс курулуп жаткан райондогу турак жайлардын баасын билүү үчүн Ташкенттеги бир нече кыймылсыз мүлк агенттигине телефон чалып чыкты. Маалыматка ылайык, 100 чарчы метр ал жерде 100 миң доллар турат. Спутник сүрөттөрү курулуштун аянты бир жарым гектарга жетерин көрсөтүүдө. Демек, жалпы баасы 15 миллион доллардын айланасында болот. Ал жер тилкесинде базар баасы 500 миңден 1 миллион долларга жеткен 20 чакты үй орун алганын эске алганда кыймылсыз мүлктүн жалпы баасы 20 миллион доллардан ашарын болжолдосо болот.
Учурда мамлекеттик расмий мекемелердин маалыматында курулуш пландалган жер тилкелеринин кожоюндарынын тек-жайы ачык жазылбаганы менен журналисттердин колуна түшкөн мурдагы документтерде алардын аты-жөнү жазылган.
Ошол документтерге ылайык, 2022-жылдын июнунда, ал жер тазалана баштаганда сегиз жер тилке Өзбекстандын дзюдо федерациясынын өкүлү Зафар Мамажоновго таандык болуп чыкты. “Озодлик” буга чейин жүргүзгөн иликтөөсүндө анын Умаров менен байланышын аныктаган.
Редакция жаңы комплекс тууралуу Умаров, Мамажонов, Мирзиёевдин кеңсесине, Өзбекстандын өкмөтүнүн Коррупция менен күрөшүү агенттигине суроолорун жөнөткөнү менен жооп алган жок.
Умаровго тиешеси бар комплекс Ташкенттин чыгышындагы Мирзо Улугбек районунун Шортепа конушунда салынууда. Ал жакта жогорку аткаминерлер жана олигархтар жашайт. Учурда курулуш бийик темир тосмо менен курчалып, көзөмөл камералары орнотулган, айлана-тегеректи кароолчулар кайтарып турат.
Иликтөөнүн толук вариантын бул жерден окуңуз.