Эл аралык иликтөөчүлөр Өзбекстан санкциялык товарларды Орусияга реэкспорт кылып жаткан негизги өлкөлөрдүн бири экенин айтып келишет. Орусиянын монополиялык "Газпром" компаниясы 2023-жылдан тарта Өзбекстанга газ жеткире баштаган. Бүгүнкү күндө Москва Ташкенттин негизги соода өнөктөштөрүнүн бири бойдон калууда. Бул көрсөткүч боюнча Орусия Кытайдан кийинки экинчи орунда турат.
Путин менен Мирзиёев акыркы жолу 9-майда Москвада жолугушкан. Анда өзбек президентинин басма сөз кызматы сүйлөшүүнүн жүрүшүндө "стратегиялык өнөктөштүктү" бекемдөө жана соода-экономикалык кызматташтыкты өнүктүрүү маселелери талкууланганын билдирген.
Мирзиёев Кызыл аянттагы быйылкы аскердик парадга Борбор Азиядагы башка өлкөлөрдүн лидерлери менен бирге катышкан.