Россияда ноқонуний бўлиб турган хорижликлар реестри тузилмоқда. Бу рўйхатга тушган муҳожирларга транспорт воситаларини бошқариш, банк хизматларидан фойдаланиш, мулкни рўйхатдан ўтказиш, никоҳ тузиш ва ажрашиш, болаларни боғча ва мактабларга расмийлаштириш имконияти берилмайди. Бу ҳақида Ички ишлар вазирининг биринчи ўринбосари Александр Горовой "Коммерсант" нашрига маълум қилган.
Реестр қачондан ишга тушиши ҳақида хабар берилмаган.
Бундан ташқари, 2024 йил 1 декабрдан Москва аэропортларида тажриба тариқасида хорижликларни фото ва дактилоскопик идентификация қилиш тартиби жорий этилади.
Горовойнинг сўзларига кўра, ҳозирда Россияда 6 миллион 174 минг нафар чет эл фуқароси бор. Фуқаролар сони бўйича биринчи ўнталикка Ўзбекистон, Тожикистон, Қирғизистон, Беларус, Украина, Арманистон, Озарбайжон, Қозоғистон, Хитой ва Туркманистон кирган.
"Ноқонуний муҳожирлар ҳақида гапирадиган бўлсак, улар асосан Ўзбекистон, Тожикистон, Қирғизистон, Арманистон ва Озарбайжон фуқароларидир," - деди ИИВ вазири ўринбосари.
Уларнинг умумий сони 739 мингга яқин деб таҳмин қилинмоқда. Бу барча муҳожирларнинг 9 фоизидир. Аввалроқ бу рақам 30 фоиздан кўпроқни ташкил этган.
Россияда ноқонуний бўлиб турган хорижликлар реестри тузилмоқда.