Маълум қилинишича, Сузоқ тумани собиқ депутати, 1984 йилда туғилган У.Ш., криминал авторитет Салим Абдувалиев билан алоқаси туфайли ДХХга олиб келинган.
Собиқ депутат билан профилактик суҳбат ўтказилиб, уюшган жиноий гуруҳ мафкурасидан воз кечиш мажбурияти олинган. Аввалроқ унинг ижтимоий тармоқларда ўзбекистонлик криминал авторитет Салим Абдувалиев билан тушган сурати пайдо бўлган эди.
«Тушунтириш тадбирларидан сўнг У.Ш. жиноий алоқадан воз кечди ва Қирғизистон Республикасининг режалаштирилган сиёсий йўналишини қўллаб-қувватлашини маълум қилди», дейилади хабарда.
Маълум қилинишича, 2023 йил декабрь ойида Сузоқ қишлоқ кенгаши депутати сифатида олиб келинган фуқаро ер участкалари билан боғлиқ фирибгарликларга алоқадорлигини тасдиқловчи далилларни йўқ қилиш мақсадида Сузоқ қишлоқ ҳокимияти биносига ўт қўйишда айбдор деб топилиб, 100 минг сўм жаримага тортилган.
Тергов давомида у 6 млн сом миқдорида зарарни қоплаган бўлиб, бу маблағлар ёниб кетган қишлоқ ҳокимияти биносини таъмирлашга йўналтирилган.
Аввалроқ, Ўш шаҳрида таниқли тадбиркор, истеъфодаги милиция полковниги Жалил Атамбаев ҳамда Жогорку Кенеш собиқ депутати Салайдин Айдаров уюшган жиноий гуруҳларни молиялаштиришда гумонланиб, ҳибсга олинган.
Миллий хавфсизлик давлат қўмитаси (МХДҚ) уларга нисбатан ўзбекистонлик криминал авторитет, “Салимбойвачча” номи билан машҳур олигарх Салим Абдувалиев билан алоқаларга доир айблов бўйича жиноят иши қўзғатган. Август ойида қирғиз махсус хизматлари Абдувалиевни халқаро қидирувга берди ва унинг ўтган йили октябрда махсус амалиёт чоғида ўлдирилган қирғиз криминал авторитети Қамчи Қолбаев билан тушган фотосуратларини эълон қилди.
