Париж олимпиадасында 71 келіде бокстасқан Асланбек Шымбергенов иорданиялық Зейяд Ишаиштан, Қамшыбек Қоңқабаев испаниялық Аюф Гадфадан (ата-анасы марокколық) жеңілді. Екі жекпе-жек те 2:3 есебімен (бес төрешінің шешімі ұпайға бөлінеді) аяқталды. Ал 51 келіде Махмұд Сабырханды испаниялық Хосе Квилес 1:4 есебімен жеңіп кетті.
Жеребе тартылғанда жанкүйерлер дәл осы үш боксшы бірінші кезеңде-ақ жеңіліп қалады деп күтпеген еді. Мәселен, 32 жастағы Қоңқабаев финалға дейін жетіп, басты бәсекелесі – өзбекстандық Баходир Жалоловпен (Токио-2020 олимпиадасының чемпионы) алтынға таласады деген болжам да болған.
Үш боксшы жеңілгеннен кейін "рингте барын салғанын, қолдан келгеннің бәрін жасағанын" айтты.
"Көнеміз енді, не істейміз?" деді Шымбергенов жекпе-жек аяқталған соң. Ал Қоңқабаев "төреші кімнің қолын көтерді, сол ұтты. Бәрін шаршы алаңның сыртынан көрдіңіздер" деп қысқа қайырды. Сабырхан "ұтылғанды мойындау керек" деп қорытындылады олимпиадасын.
Олимпиадаға барған қазақстандық жеті боксшының үшеуі бірінші айналымнан аса алмай қалған тұста Пекин олимпиадасының чемпионы Бақыт Сәрсекбаев "жігіттердің физикасы өте нашар" деп сын айтты.
Бокс туралы жазатын "Бей в кость" телеграм-арнасының авторы, спорт журналисі Леонид Юрьев жеңілген үш боксшы рингте сылбыр қимылдап, әлсіз жүрді деп есептейді.
Дегенмен бокстан Қазақстанның ерлер құрамасының әлі де жүлде алуға мүмкіндігі бар. 31 шілдедегі жағдай бойынша, Париждегі олимпиадада Сәкен Бибосынов (51 келі), Мұхаммедсабыр Базарбайұлы (63,5 кг), ағайынды Нұрбек (80 кг) және Айбек Оралбай (92 кг) жүлдеге таласады.
Бұдан бөлек, әйелдер боксынан Назым Қызайбай (50 кг) мен Карина Ибрагимова (57 кг) да рингке шығады.
Париж олимпиадасында Қазақстанның үш боксшысы бірінші айналымда бәсекесінен жеңіліп қалды. Боксшылар рингте барын салғанын айтады. Ал сарапшылар боксшылардың физикалық дайындығын сынға алды.