Раёсати умури дохилии шаҳри Душанбе рӯзи 22-уми июл бо нашри як баёния гуфт, Диловар Шерализодаи 28-соларо барои ғайриқонунӣ сиёҳ кардани шишаи мошини гаронбаҳояш "Тойота Ленд Крузер" ва насби чароғҳои махсус барои мошинҳои милиса дастгир кардаанд.
Маълум нест, ки ӯро ба боздоштгоҳ бурдаанд ё не, аммо Диловар Шерализодаро барои ин қонуншиканиҳо зиёда аз 11500 сомонӣ ва ё бештар аз 1000 доллар ҷарима бастаанд.
Ӯ, ки писари Гул Шералӣ, вазири собиқи энергетика аст, дар гузашта барои авбошӣ ва дигар ҷиноятҳо ҷазо гирифтаву зиндонӣ ҳам шудааст.
Яке аз фарзандони дигари Гул Шералӣ, домоди президент Эмомалӣ Раҳмон аст. Чунин рафтори писарони мансабдорони собиқ ва ё феълиро дар шабакаҳои иҷтимоӣ баёнгари худсарӣ ва беэътиноии онҳо ба қонун номидаанд.