Фуқаролар, хусусан, Россияга киришда ёки Москванинг «Шереметьево» халқаро аэропорти орқали транзит ўтишда қийинчиликлар юзага келаётганини хабар бермоқда. Ушбу қийинчиликлар тегишли аэропорт хизматлари томонидан қўшимча ва ҳаддан ташқари узоқ текширувлар билан боғлиқ.
Вазиятга ойдинлик киритиш мақсадида элчихона РФ Ташқи ишлар вазирлигига мурожаат юборди, дейилади хабарда.
Шу билан бирга, элчихонанинг консуллик бўлими «Шереметьево» аэропортининг чегара назорати хизмати билан доимий алоқада, дея таъкидлади дипломатик миссия.
Жорий йилнинг март ойида Марказий Осиёдан келган муҳожирлар Москва яқинидаги «Крокус сити холл»да теракт содир этишда айбланаётгани фонида Россияда мигрантларга қарши чоралар, хусусан, виза режимини жорий этиш, ҳуқуқбузарлик учун депортация қилиш ҳамда патентлар бўйича чекловлар муҳокамаси авж олганди.
Шавкат Мирзиёев Россия президенти Владимир Путиннинг яқинда Ўзбекистонга ташрифи чоғида меҳнат миграцияси масаласини муҳокама қилганди. «Владимир Владимирович ушбу нозик масала бўйича таклифларимни қўллаб-қувватлаганидан жуда мамнунман. Ўйлайманки, биз ҳали бу масалада ҳар икки томондан зарурий тартибни йўлга қўямиз», — деганди Ўзбекистон раҳбари.