Ўзбекистон президентининг кенжа куёви Отабек Умаров ўзбекистонлик муҳлислар билан биргаликда ёшлар терма жамоалари ўртасидаги футбол финалига учиб кетган. Ўзбекистон Футбол Федерацияси томонидан ташкил этилган чартер рейси 3 май куни Тошкентдан учиб, 4 май ортга қайтган. Сўнгги жаҳон нархларига кўра, бундай аэробусни ижарага олишнинг бир соати ўзбекистонлик солиқ тўловчиларга жами 18 минг долларга тушади.
Ушбу рейсда учган йўловчилардан бирининг соати тўртта шундай чартер рейслари нархига тенг. Бу соат президентнинг куёви Отабек Умаровга тегишли. Унинг Richard Mille RM UP-01 Ferrari соатининг нархи деярли 2 миллион долларга баҳоланмоқда.
Шу тариқа, давлат хизматчиси бўлган Отабек Умаровнинг соати пулига 32232 нафар ўзбекистонлик пенсионерларга бир ойлик нафақасини тўласа бўлади.
Отабек Умаров бундай соатни қандай сотиб олди, унинг даромад декларацияси борми, солиқлар тўланганми? Умаровнинг ўзи ва Ўзбекистоннинг бошқа расмий вакиллари ижтимоий тармоқ фойдаланувчиларининг бу саволларига ҳозирча изоҳ беришмаган.
Баъзи фойдаланувчилар, агар бу соат совға тариқасида келган бўлса ҳам, бундай совғалар катта пора ва коррупцияни кўрсатгичидир, деган фикрни билдирди. Аввалроқ Озодлик эълон қилган журналистик суриштирувида Отабек Умаров ва унинг шерикларининг шубҳали битимларга алоқадорлиги бир неча бор қайд этилган.
Хусусан, бундан уч йил муқаддам мутлақ номаълум хусусий компания осмондан тушгандек пайдо бўлиб¸ давлатнинг 100 миллион доллардан ошиқ газ контрактларини қўлга киритдию¸ бир йил ўтиб-ўтмай, дом-дараксиз ғойиб бўлди. Озодликнинг янги журналистик суриштируви газ олди-бердисида ўртакашлик қилиб миллионларни чўнтагига урган бу компания ўзини коррупцияга қарши курашчи сифатида тақдим этиб келаëтган президент Шавкат Мирзиëевнинг куëви Отабек Умаровга алоқадорлигини ўртага чиқарди.