Филми коргардон Мстислав Чернов севумин филми украинӣ аст, ки ба олитарин ҷоиза номзад мешавад ва нахустин филм аст, ки тандиси тиллоиро соҳиб мегардад.
"Ин нахустин "Оскар"-и украинӣ аст. Вале ман мехостам, ки ҳаргиз ин филмро сабт накунам ва ба ин саҳна набароям ва мехостам, ки Русия ба Украина ҳамла накунад. Кош метавонистам, ин ҷоизаро иваз кунам ва Русия наметавонист, шаҳрҳои моро ғасб кунад", - гуфт Мстислав Чернов дар саҳнаи тақдими ҷоизаҳо.
Маросими 96-уми тақдими ҷоизаи Академияи синамоии Амрико шоми 10 ба 11 март дар Лос-Анҷелес барпо шуд. Беҳтарин филм дар ин маросим "Оппенгеймер" дониста шуд, ки дар бораи "падари бомбаи атомӣ" Роберт Оппенгеймер нақл мекунад.