Маълумотга кўра, жорий йилда 888 минг 472 нафар абитуриент тест синовларида қатнашган. Уларнинг 439 минг 337 нафари (49,4%) 56,7 балл ҳам тўплай олмаган.
«Демак, улар мандат чиқмасидан аввал курашдан чиқди. Чунки 56,7 баллдан кам тўплаганлар квотада жой бўлса ҳам, ўқишга кира олмайди», — дея ёзади блогер.
56,7 дан кўп балл тўплаган абитуриентлар сони 449 минг нафарни (50,6%) ташкил қилган. 2022 йили 51,2% фоиз, яъни 550 минг абитуриент 56,7 балл ҳам тўплай олмаганди.
2023 йилда энг ёмон кўрсаткич Сирдаро вилоятида (54,9%), нисбатан яхшироқ натижа эса худди ўтган йилдагидек Тошкент шаҳрида (40,8%) қайд этилган. 8 та ҳудудда абитуриентларнинг 50 фоиздан кўпроғи 56,7 баллдан паст балл олган.
Бу йилги кириш имтиҳонларида 948 486 нафар абитуриент тест синовида қатнашиши керак эди. Аммо Билимни баҳолаш агентлиги маълумотларига кўра, иши қийматланмаган абитуриентлар сони 59 866 нафарни ташкил этган, яъни шунча номзод синовларда иштирок этмаган. Шунингдек, 148 нафар абитуриент тестдан четлатилган.
20 июль куни Ўзбекистон олийгоҳларига ҳужжатларни қабул қилиш жараёни якунланган эди. Абитуриентларнинг 577 096 нафари кундузги, 24 802 нафари кечки, 407 945 нафари сиртқи ва 8 164 нафари масофавий таълим шаклини танлаган.
Абитуриентлар энг кўп ҳужжат топширган олийгоҳ Ўзбекистон миллий университети бўлди. Бу олийгоҳ 36 782 нафар абитуриентнинг ҳужжатини қабул қилиб олган.