Хабарда билдирилишича, Ўзбекистон судлари томонидан 15 киши 14 ёшга тўлмаган шахснинг номусига тегиш, 44 киши 14 ёшга тўлмаган шахсга нисбатан зўрлик ишлатиб, қўрқитиб ёки жабрланувчининг ожизлигидан фойдаланиб, жинсий эҳтиёжни ғайритабиий усулда қондириш, 163 киши 16 ёшга тўлмаган шахс билан жинсий алоқа қилиш ва 35 киши 16 ёшга тўлмаган шахсга нисбатан уятсиз-бузуқ ҳаракатлар қилиш жиноятларини содир этганликда айбдор деб топилган.
“Бу ҳозирча ҳуқуқ тартибот органларига маълум бўлгани холос, қозон ёпиқлигича қолиб кетаётган ҳолатлар қанча?”- дейилади хабарда.
Сўнгги пайтларда Озодлик радиоси Ўзбекистонда балоғатга етмаган болаларга нисбатан жинсий зўравонликлар содир этилгани тўғрисида кўплаб хабарларни эълон қилди. Жумладан, июль ойининг бошларида Тошкентда ИИБ ходими 13 ёшли қизни зўрлагани, июнь ойи охирида Наманган вилоятида 64 яшар эркак вояга етмаган болакайни алдаб, жинсий эҳтиёжини қондиргани хабар қилинган. Бу шахсларга нисбатан жиноят ишлари очилган.
Бир неча кун олдин эса Олмалиқда ёш болаларни жинсий алоқани имитация қилишга мажбурлаган шахс аниқланган. Расмийлар унинг руҳий касал эканини ва махсус диспансерга даволаниш учун ётқизилганини билдирган. Кейинроқ мазкур ҳолат юзасидан жиноят иши очилгани маълум қилинди.
Жорий йилнинг олти ойида 16 ёшга тўлмаганларга жинсий тажовуз қилгани учун 257 киши судланди. Бу ҳақда Militsiya uzb расмий телеграм каналида маълум қилинди.