Адлия вазирлигининг билдиришича, қонунга асосан Миллий гвардия ва Ички ишлар органлари тўғрисидаги қонунларга ўзгартиришлар киритилган. Мазкур ўзгартишларга биноан бундан буён Миллий гвардия ҳамда ички ишлар органлари экология ва атроф-муҳитни муҳофаза қилиш соҳадаги ҳуқуқбузарликларга қарши курашиш ваколати берилди.
Миллий гвардия ва ички ишлар органлари экология ва атроф-муҳитни муҳофаза қилиш соҳасида ҳуқуқбузарликлар содир этган айбдор шахсларни маъмурий жавобгарликка тортиш ҳуқуқига эга бўлади.
Қонун расмий эълон қилинган кундан эътиборан 3 ой ўтгач кучга киради.
Сўнгги марта Миллий гвардия ваколатлари жорий йилнинг майида кенгайтирилган эди. Олий Мажлис Сенати 3 май куни маъқуллаган “Маъмурий жавобгарлик тўғрисидаги кодексга ўзгартишлар киритиш ҳақида”ги қонунга асосан, Миллий гвардия ходимлари майда безорилик қилганлар ва совуқ қурол олиб юрганларга нисбатан баённома тузиш ва уни судга юбориш ваколатига эга бўлган.
Бундан ташқари Миллий гвардия вояга етмаган шахсни маъмурий ҳуқуқбузарлик содир этишга ундаганларни, жамоат жойларида алкоголь ичганларни, миллий, ирқий, этник ёки диний адоватни тарғиб қилувчи материалларни тайёрлаган, сақлаган ёки тарқатганларни, тиланчилик қилганларни ва қимор ўйнаганларни жаримага тортиши мумкин.
“Маъмурий жавобгарлик тўғрисидаги кодекс”га киритилган ўзгартишларга мувофиқ Миллий гвардия ҳуқуқбузарлик содир этган шахсларни маъмурий йўл билан ушлаб туриш ваколатига ҳам эга бўлади.
Миллий гвардия ва ички ишларга экологик ҳуқуқбузарлик содир этганларни жазолаш ваколати берилди
Президент 11 июль куни “Экология ва жамоат тартибини сақлаш соҳаларидаги қонунчилик такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонунни имзолади.