“Қандай машаққат билан чет давлатга бориб, банклар, тадбиркорлар билан учрашаман, катта-катта лойиҳаларни келишаман. Лекин, менинг вакилларим бўлган одамлар ухлаб ўтирибди, мудраб ўтирибди”, — деган Шавкат Мирзиёев нутқи давомида: “Мен ишлаган, хато қилган одамни кечираман, лекин хиёнат қилган одамни ҳеч қачон кечирмайман”, - деб таъкидлаган. Шунингдек, президент “Хиёнат қилганга ўрин йўқ”, деб айтди.
Бундан ташқари видеода президент “Ўзтўқимачиликсаноат”, “Иссиқлик электр станциялари” ва “Ўзсаноатқурилишбанк” раисларига ҳайфсан бергани акс этган.
“Охирги ҳайфсан буларга. Сўнгги огоҳлантириш. Агар уч ой ичида ўзгариш қилмаса, жавобгарликка тортилиб, барча зарар ва олинмаган фойда улардан ундириб олинади”, — деди президент.
Озодлик радиоси аввалроқ 9 июлда президентилкка қайта саланган Шавкат Мирзиёев ўнта туман ва иккита шаҳар ҳокими ҳамда беш нафар мулозимни ишдан олгани тўғрисида хабар берган эди.
Хусусан, “кўрсаткичлар пастлиги, инвестиция муҳити қониқарсизлиги” учун Амударё, Қўрғонтепа, Бухоро, Миришкор, Чироқчи, Хатирчи, Пайариқ, Оқолтин, Гулистон ва Оққўрғон туманлари, Навоий ва Янгийўл шаҳарлари ҳокимлари ўз лавозимларидан бўшатилган.
Шунингдек, “инвестицияларни жалб қилиш ва уларни ўзлаштиришда сусткашликка йўл қўйганликлари учун сув хўжалиги вазири ўринбосари Б. Камалов, транспорт вазири ўринбосари А. Мўминов, “Сувтаъминот” раҳбари С. Саифназаров, “Темир йўл” раҳбари Х. Ҳосилов ва “Автойўл” раҳбари А. Абдувалиев эгаллаб турган вазифаларидан озод этилган.