Президент матбуот хизмати маълумотига кўра, бу қарорини Мирзиёев 11 июль куни ўтказилган видеоселектор йиғилишида очиқлаган.
Хусусан, “кўрсаткичлар пастлиги, инвестиция муҳити қониқарсизлиги” учун Амударё, Қўрғонтепа, Бухоро, Миришкор, Чироқчи, Хатирчи, Пайариқ, Оқолтин, Гулистон ва Оққўрғон туманлари, Навоий ва Янгийўл шаҳарлари ҳокимлари ўз лавозимларидан бўшатилган.
Шунингдек, “инвестицияларни жалб қилиш ва уларни ўзлаштиришда сусткашликка йўл қўйганликлари учун сув хўжалиги вазири ўринбосари Б. Камалов, транспорт вазири ўринбосари А. Мўминов, “Сувтаъминот” раҳбари С. Саифназаров, “Темир йўл” раҳбари Х. Ҳосилов ва “Автойўл” раҳбари А. Абдувалиев эгаллаб турган вазифаларидан озод этилган.
Бу орада Марказий сайлов комиссияси 11 июлдаги мажлисида “муддатидан илгари Ўзбекистон Республикаси Президенти сайлови натижалари”ни кўриб чиқиб, тасдиқлаган.
МСК қайдича, мажлисда 9 июль куни ўтказилган сайловда иштирок этган сайловчиларнинг 87,05 фоиз овози билан Шавкат Мирзиёев Ўзбекистон президенти лавозимига сайланганлиги тўғрисида қарор қабул қилинган.
Президент сайловидан 70 кун аввал ўтказилган янги таҳрирдаги Конституция бўйича референдум ортидан Мирзиёев учун 2037 йилгача давлат раҳбари лавозимида қолиш йўли очилган эди.
Марказий сайлов комиссиясининг бугунги хабарномасида қайта сайланган президентни қасамёдга келтириш маросими қайси санада ўтказилиши ҳақида маълумот берилган эмас.
Ўзбекистон Сайлов кодексида мамлакат президенти МСК томонидан президент сайлови натижалари расмий равишда эълон қилинган кундан эътиборан кечи билан икки ой ичида Олий Мажлис палаталарининг қўшма мажлисида қасамёд қилган пайтдан эътиборан ўз лавозимига киришиши кўзда тутилган.
Ўзбекистонда якшанба куни ўтказилган президент сайловида МСК томонидан ғолиб деб эълон қилинган Шавкат Мирзиёев ўнта туман ва иккита шаҳар ҳокимлари ҳамда беш нафар мулозимни ишдан олишга қарор қилди.