Ўзбекистон Маданият вазирлиги хабарига кўра, концерт дастури “айрим техник сабабларга кўра” қолдирилган. Сотилган чипталарнинг пули қайтарилади.
Лепс Россиянинг Украинага қарши олиб бораётган урушини фаол қўллаб-қувватлаётгани сабаб ўзбекистонликлар унинг Ўзбекистонда концерт беришига қаршилик билдириб, ижтимоий тармоқларда фаол кампания олиб бораётган эди.
Аввалроқ Маданият ва туризм вазири ўринбосари Баҳодир Аҳмедов Ўзбекистонда санъат учун ҳеч қандай тўсиқ йўқлигини айтди. «Келяпти, санъатини намойиш қиляпти, кетяпти», — деди у санъаткорлар ҳақида.
Вазир ўринбосари, шунингдек, Лепснинг ҳарбий амалиётларни молиялаштиргани ҳақидаги хабарларга шубҳа билдирган.
Июн ойи ўрталарида Григорий Лепс бошқа бир хонанда Николай Басков билан Петербург иқтисодий форумида чиқиш қилиб, Украина қўшинларига Ғарб томонидан етказиб берилган танкларни йўқ қилган ҳар бир россиялик аскарга 1 млн рублдан мукофот ваъда қилган эди. 3 июл куни Лепс Украинада Германиянинг Leopard танкини йўқ қилган жангчилардан бирига худди шунча суммани ўтказиб берганини айтди.
Июнь ойида Григорий Лепснинг Қозоғистондаги концерти ҳам жамоатчилик норозилиги туфайли бекор қилинган эди.