Бир неча кун муқаддам блогер Мирзо Зоминий ўз Telegram-канали орқали #LepsKerakmas хэштеги билан кампания бошлаган эди. Блогер ўз ташаббусини қўшиқчи Лепснинг Украинадаги урушни дастаклаётгани билан изоҳлаган.
"Ўзбекистон сенларнинг ота-бобонгдан қолган мулк ёки жангчиларингни мукофотлаш учун пул йиғиладиган жой эмас. Тошкентдаги концерти учун чипталар 150 000 сўмдан 4 миллион сўмгача экан. Ор-номуси бор ўзбекистонликлар, максимум бўлишинг. Қонхўр машина ёқилғи билан таъминланишига йўл қўйманг“, деб ёзган эди блогер ўтган ҳафтада.
Кампаниядан бир неча кун ўтиб Iticket.uz сайтидан Григорий Лепс концертига оид афиша олиб ташланди.
Бундан ташқари, кремлпараст эстрада хонандаси Ирина Дубцованинг ҳам Тошкентда бўлиб ўтиши керак бўлган концерти бекор қилингани айтилмоқда.
Россиялик хонандалар Григорий Лепс ва Николай Басков бир неча ҳафта муқаддам Украина Қуролли кучларига оид танкларни йўқ қилган ҳар бир кишига бир миллион рублдан мукофот беришларини эълон қилишган эди. Бунинг ортидан Лепснинг Қозоғистондаги концерти бекор қилингани ҳақида Озодлик аввалроқ хабар қилган.
Норозилик ортидан россиялик қўшиқчилар Лепс ва Дубцованинг Тошкентдаги концертлари бекор қилинди
Россиялик қўшиқчи Григорий Лепснинг шу йил 23 октябрида Тошкентда бўлиб ўтиши кутилаётган концерти бекор қилинди. Бунга ижтимоий тармоқларда бир гуруҳ ўзбекистонликларнинг Лепс концертини бекор қилиш талаби билан чиққани сабаб бўлгани тахмин қилинмоқда.