АҚШ Давлат департаментининг маълум қилишича, Блинкен ва Ган икки томонлама муносабатларни барқарорлаштириш ва кескинлаштирмаслик ниятини билдирганлар. Давлат департаменти баёнотида музокаралар “очиқ, мазмунли ва конструктив” ўтгани таъкидланди. Шу билан бир қаторда Блинкен АҚШ ўз манфаатларини ҳимоя қилишда ва иттифоқчилари билан “очиқ ва эркин дунё” учун курашда давом этишини айтган.
Давлат департаменти баёнотида учрашувда Тайван ва Украина ҳақида гап бўлгани тўғрисида маълумот берилмади.
Хитой ТИВ тарқатган баёнотда эса Тайван муаммоси Хитой-Америка муносабатлари учун энг жиддий таҳдид экани қайд этилади. Цинь Ган учрашувда Пекин Вашингтон билан “барқарор ва конструктив” муносабат ўрнатишдан манфаатдор эканини айтган.
Блинкеннинг Хитойга ташрифи икки кун давом этади. Унинг Хитой раиси Си Цзиньпин билан учрашиши ҳам кутилмоқда.
Блинкеннинг Пекинга ташрифи февраль ойига режалаштирилган эди. Бироқ АҚШда Хитойга тегишли аэростат уриб туширилгач, ташриф қолдирилганди. Вашингтон ўшанда Хитойни аэростат воситасида жосуслик қилганликда айблаган. Хитой эса бу аппарат йўналишидан адашган метеозонд эканини билдирган.
Блинкенннинг Хитойга ташрифидан мақсад Си Цзиньпин билан Жо Байден учрашувини тайёрлашдир. АҚШ президенти Жо Байден аввалроқ Си Цзиньпин билан яқин ойларда учрашиш режаси борлигини билдирган эди.
АҚШ давлат котиби Энтони Блинкен 18 июнь куни Пекинга расмий ташрифи доирасида Хитой ташқи ишлар вазири Цинь Ган билан учрашди. Бу АҚШ олий мансабдорининг сўнгги беш йилда Хитойга қилган илк ташрифи бўлди.