Нашр қайдича, ишчиларга битта окоп учун 800 минг рублдан пул тўлашни ваъда қилишган.
Ўзбекистонлик ва тожикистонлик 33 нафар қурувчи Запорожьега олиб келинганидан кейин ташландиқ уйларга жойлаштирилган ва улар ишни бошлаганлар. Окоплар трактор ёрдамида қазилган, кейин эса қурувчилар уларни тўсинлар билан мустаҳкамлашган.
Аминжон исмли тожикистонлик қурувчи Baza нашрига иш тугаганидан кейин ўзига бор-йўғи 595 минг рубль пул тўланганини айтган. Ишчи Сергей Евгеньевич исмли ёлловчидан пулнинг қолганини ҳам беришни талаб қилган, бироқ ёлловчи бош тортган.
“Қолган қурувчиларнинг бир қисми Москвага қайта олмаяпти. Кимнингдир аппендицити тутиб қолди, бошқа бир ишчи бармоғидан айрилди, аммо уларга тузук-қуруқ тиббий ёрдам кўрсатилмади”, деган Аминжон.
Москвага қайтганидан кейин Аминжон полиция бўлимига бориб, ариза ёзган. Шундан кейин унга таҳдид қилинган.
“Тожикистонлик ишчи қаттиқ қўрқиб қолган ва уйидан чиқолмай ўтирибди”, дейилган Baza хабарида.