15 январь куни Тошкентдаги барча савдо ва хизмат кўрсатиш шохобчалари, кўнгилочар савдо марказлари ва истирохат боғлари қисқартирилган иш режимига ўтказилганди. 26 январь куни пойтахт ҳокимлиги ушбу чеклов бекор қилинганини маълум қилди.
«Бугунги кунда ҳаво ҳарорати яхшиланаётганлиги ва ҳолат барқарорлашаётганлиги боис юқоридаги барча корхоналар доимдагидек иш режимида фаолият олиб боришлари мумкин», — дейилади ҳокимлик хабарида.
Бунгача барча савдо ва хизмат кўрсатиш шохобчалари, кўнгилочар савдо марказлари ва истирохат боғлари иш фаолияти эрталаб соат 10:00 дан 17:00 га қадар давом этаётганди.
Шу билан бирга, озиқ-овқат дўконлари, кафе ва ресторанлар одатдагидек режимда ишлади.
Аввалроқ шаҳар ҳокимлиги электр тармоғидаги юкламани камайтириш ва марказлашган иссиқлик таъминоти тизимидаги ҳароратни ошириш мақсадида кўп қаватли уйларнинг иссиқ сув таъминоти тизимидаги ҳароратни камида уч кун муддатга вақтинча пасайтиришга мажбур бўлишини маълум қилганди.