Нашр манбаларига кўра, эндиликда Туркияга келиб, илк бор ижара шартномаси асосида “иқомат изни” олмоқчи бўлган россияликларга ҳужжат берилмаяпти. Рад жавобини олган аризачилардан эса 10 кун ичида Туркияни тарк этиш сўралмоқда.
Россияликлар Туркияда визасиз 60 кун юришлари мумкин. 60 кундан кейин мамлакатдан чиқиб кетганлар ярим йил ичида ортга қайтган тақдирда, Туркияда яна 30 кун ҳужжатсиз юришлари мумкин.
Аввалроқ МДҲнинг бошқа давлатларидан, хусусан Ўзбекистондан Туркияга янги борган фуқаролар ҳам ижара шартномаси асосида яшаш учун рухсатнома ололмаётганларидан шикоят қилиб келаётган эдилар. Бу орада, маҳаллий нашрлар хабарларига кўра, Туркияга кетган украиналикларга ватанларидаги уруш тугагунига қадар вақтинча яшаш учун рухсатнома бериш давом эттирилмоқда.
Туркияда мамлакатга туристик мақсад билан келиб, яшаш учун рухсатнома олмоқчи бўлган россияликларнинг аризалари 26 декабридан эътиборан рад этила бошлаган. Бу ҳақда Vpost нашри гувоҳлар сўзларига таянган ҳолда хабар қилди.