Ба иттилои Бакит Рисбеков, мудири Маркази миллии муқобила бо шиканҷа, кормандони маркази мазкур бо боздоштшудаҳо мулоқот кардаанд. Ҳоло вакили пешин Равшан Ҷеенбеков, фаъоли шаҳрвандӣ Атай Бейшенбек ва раиси пешини вилояти Ҷалолобод Бектур Асанов ба гуруснашинӣ пайвастаанд.
Пештар аз ин боздоштшудаҳои дигари "Парвандаи Кампиробод" Клара Сооронқулова, Рита Карасартова, Перизат Суранова ва Орозайим Нарматова муроҷиатномаеро ба унвонии созмонҳои ҳомии ҳуқуқи байналмилалӣ ва ҷомеаи кишвари худ нашр карданд.
Фаъолон гуфтаанд, ба далели "таъқибҳои густардаи сиёсӣ, ки бозшавии парвандаҳои сохтаи ҷиноӣ, ноадолатӣ ва беқонуниро нисбат ба доираи васеи сиёсатмадорон, рӯзноманигорон ва фаъолони мадании Қирғизистон дар пай доранд, аз 14 декабр гуруснанишинӣ эълом мекунанд".
“Мо аз 23 октябри соли 2022 бо иттиҳомҳои сохтаи сиёсӣ аз озодӣ маҳрум карда шудаем ва мақомоти тафтишотии кишвар то ҳол нисбати айбдоршавандаҳо ҳеч гуна амали тафтишотиеро анҷом намедиҳанд. Бо вуҷуди ин, додгоҳи ноҳияи Якуми майи шаҳри Бишкек ҳабси моро то 20 феврали соли 2023 тамдид кардааст. Мо изҳор медорем, ки роҳбарияти Қирғизистон ҳуқуқу озодиҳои моро саркӯб ва мухолифони сиёсии худро таъқиб мекунад", - омадааст дар муроҷиатнома.
Рӯзи 22 октябри соли 2022 дар Қирғизистон Кумитаи ҳифзи обанбори Кампиробод таъсис шуд. Аъзои кумита иборат аз фаъолони шаҳвандӣ ва сиёсатмадорони Қирғизистон зидди ба Узбекистон додани обанбори Кампиробод баромад карданд. Рӯзи 23 октябр дар шаҳри Бишкеки Қирғизистон боздошти аъзои кумита шуруъ шуд ва дар маҷмуъ 26 тан аз фаъолону сиёсатмадорон боздошт шуданд.
Мақомоти Қирғизистон онҳоро дар "Омодагӣ ба ташкили бетартибиҳо" гумонбар мекунанд.