Зоиршо Давлатёров, вакили дифои ин хабарнигор рӯзи 4-уми ноябр ба Радиои Озодӣ гуфт, ҳукми Завқибек Саидаминӣ рӯзи 3-юми ноябр дар Боздоштгоҳи муваққатии шаҳри Душанбе эълон шуд. "Ҳоло баъд аз машварат бо зерҳимояам, тасмим мегирем, ки ба зинаи болоӣ шикоят кунем ё не",-афзуд вакили дифои Завқибек Саидаминӣ.
Ҷузъиёти дигари ҳукми додгоҳ дастрас нест. Қаблан пайвандонаш гуфтанд, ки Саидаминӣ гуфтааст, "бегуноҳ аст, ба зинаҳои болоӣ ва президент номаи шикоятӣ хоҳад навишт". Вай ҳамчунин аз ҳамкасбонаш, ки қазияи боздошти ӯро инъикос карданд, изҳорӣ сипос кардааст.
Ин рузноманигори тоҷик ба ҳамкорӣ бо созмонҳои дар кишвар мамнӯи Ҳизби наҳзати исломӣ ва "Гурӯҳи 24" гумонбар аст. Худаш борҳо гуфтааст, ба ҳеч созмону гурӯҳе вобаста нест. Ҳарду созмон ҳар гуна ҳамкориро бо Завқибек Саидаминӣ рад кардаанд.
Завқибек Саидаминӣ рӯзи 8-уми июли имсол дар шаҳри Ваҳдат дастгир ва баъдан ба Боздоштгоҳи муваққатии Душанбе бурда шуд. Хабарнигори пешини "Телевизиони Тоҷикистон" бо суҳбатҳояш дар шабакаҳои иҷтимоӣ машҳур гашта, аз зумраҳои онҳое дониста мешуд, ки талош доранд, ҳақиқатҳо гуфта шаванд. Дар яке аз маъракаҳои интихоботӣ талош кард, ба таври худпешбарӣ номзад шавад, аммо номзадии ӯро сабт накарданд ва ин ҳам яке аз ангезаҳои интиқодии журналист шуд.
Завқибек Саидаминӣ борҳо ба минтақаи низоъ дар марзи Тоҷикистону Қирғизистон рафта, аз онҷо гузориш медод. Солҳои охир ба соҳибкорӣ ва барномаҳои хайрия машғул буд.
Дар ним соли охир дар Тоҷикистон дастикам 7 рӯзноманигору блогер дастгир ва се нафари онҳо – Муҳаммади Султон ба 7, Абдуллоҳ Ғурбатӣ ба 7,5 ва Далери Имомалӣ 10 сол зиндон – маҳкум шудаанд. Созмонҳои ҳомии ҳуқуқ ҳукмҳоро танқид кардаанд, вале мақомот дуруст мешуморанд.