Украинанинг Закарпатя вилоятига 6 июнь куни Ўзбекистондан инсонпарварлик ёрдами келди, дея хабар қилди вилоят раҳбари Виктор Микита.
Унинг сўзларига кўра, 19 тоннадан ортиқ дори-дармонлар самолёт орқали Словакиядаги гуманитар марказга етказилган, шундан сўнг улар Закарпатяга етказилган.
Виктор Микитанинг таъкидлашича, гап 12 ном 200 минг донадан ортиқ миқдордаги антибиотик ва витаминлар ҳақида кетмоқда. Ёрдам қиймати 1 млн доллардан ошади.
«Кўрсатган ёрдами учун ўзбекистонлик дўстлар, тадбиркорлар, кўнгиллилар ва шахсан Украинанинг Ўзбекистондаги элчиси Николай Дорошенкога координация ва самарали гуманитар йўлак ташкил этгани учун чин дилдан миннатдорчилик билдирамиз», — деди Закарпатя раҳбари.
Бу Ўзбекистондан Украинага юборилган иккинчи юкдир. Биринчи марта ёрдам — 34 тоннадан ортиқ дори-дармон, индивидуал дори-дармон қутилари ва узоқ муддат сақланадиган озиқ-овқат апрель ойида етказилди.
Эслатиб ўтамиз, яқинда БМТнинг Термиздаги гуманитар марказ ҳақидаги ҳисоботида БМТнинг Қочқинлар бўйича агентлиги у ердан Афғонистонга 1000 тонна ёрдам жўнатгани, сўнгра юкнинг бир қисмини Украинага жўнатаётгани айтилган эди.