Айрим кафе ва ошхоналар эгалари бу вазият уларнинг бизнесига таъсир қилаётганидан шикоят қилмоқда. Исми сир сақланишини истаган суҳбатдошларнинг айтишича, “Крокус Сити Холл”даги терактдан сўнг мигрантлар орасида оммабоп бўлган кафе ва ошхоналарда мунтазам рейдлар ўтказилмоқда.
Ўзбекистонлик Сардорнинг Москвада ўзининг кичик кафеси бор. Унинг айтишича, ҳозирда кўплаб кафе ва чойхоналар полиция томонидан тез-тез текширилаётгани боис ёпилган. "Бошқа шаҳарларда қандайлигини билмайман, лекин Москвада 75% кафе ва тез овқатланиш шохобчалари ёпилган", дейди у. Унинг ўзи ҳам вақтинча ишламай туришга қарор қилган. Унинг кафесининг мижозлари асосан марказий осиёлик муҳожирлар эди. Сардорнинг сўзларига кўра, "Крокус"даги терактдан сўнг мунтазам текширув ва рейдлардан қўрқиб унинг кафесига деярли ҳеч ким келмай қўйди.
“Аввал 100 та мижоздан атиги 50 таси келди, овқат қолиб кетди, биз уни ташлаб юбордик. Эртасига 50 эмас, 25 киши келди. Шундай қилиб, биз ишни тўхтатиб туриш кераклигини тушундик", дейди Сардор.
Бошқа кафе эгалари ҳам Россияда ксенофобия кайфиятлари авжга чиқиши ва полиция текширувларининг кучайиши фонида зарар кўрган соҳалардан бири овқатланиш соҳаси эканлигини тасдиқлайди.
“Чойхонада рейдлар ўтказишяпти. Ҳужжатлари бўлмаган ҳар бир киши жаримага тортилди. Илгари ташриф буюрувчилар кўп эди, ҳозир деярли йўқ”, дейди яна бир кичик кафе эгаси Аброр.
“Тожикистонликларнинг кафелари кўп эди, лекин уларни тез-тез босиб, текширувлар ўтказаверилгач, эгалари ўз шоҳобчаларини ёпишга мажбур бўлди”, дейди бошқа манба.
Сардор кафесини ёпиб, Москвадаги гул дўконида вақтинча ишламоқда. У кафесини бутунлай ёпмаган. Баъзан у овқат етказиб беришга буюртмалар олади. Вазият нормаллашса, у кафени қайта очиш ниятида.
Москва полицияси маълумотларига кўра, жорий йилнинг 10 апрель ҳолатига кўра, рейдлар давомида миграция қонунчилигини бузган 6 мингдан ортиқ шахс аниқланган. Юзлаб муҳожирлар депортация қилинди, баъзилари жаримага тортилди, баъзилари эса ҳибсда.
Москвада муҳожирлар орасида оммабоп бўлган овқатланиш шохобчалари ёпилмоқда (видео)
Россияда меҳнат муҳожирларига нисбатан тазийқлар кучайгани муносабати билан аксар марказий осиёлик муҳожирлар жамоат жойларига, жумладан, кафеларга боришдан чўчиб қолган.